ಧಾರ್ಮಿಕ:

ಆಧುನಿಕ ಶಿಕ್ಷಣ ಅಧರ್ಮಿಗಳನ್ನು ಸೃಷ್ಟಿಸುತ್ತಿದೆ ಎನ್ನುವ ಮಾತು ಸಮಾಜದಲ್ಲಿ ಕೇಳಿಬರುತ್ತಿದೆ. ಇದಕ್ಕೆ ಕಾರಣ ನೈತಿಕ, ಧಾರ್ಮಿಕ ನೆಲೆಗಟ್ಟಿಲ್ಲದ ಶಿಕ್ಷಣ ಪಡೆಯುತ್ತಿರುವುದು. ಈ ಹಿನ್ನೆಲೆಯಲ್ಲಿ ಸಾಣೇಹಳ್ಳಿಯ ಎಲ್ಲ ವಿದ್ಯಾರ್ಥಿಗಳು ಪ್ರತಿನಿತ್ಯ ಬೆಳಗ್ಗೆ ಮತ್ತು ಸಂಜೆ ಸಾಮೂಹಿಕ ಪ್ರಾರ್ಥನೆ, ಯೋಗಾಸನ ಮಾಡುವರು. ಭಕ್ತರಿಗೆ ಆಗಾಗ ಇಷ್ಟಲಿಂಗ ದೀಕ್ಷೆ ಕರುಣಿಸಲಾಗುವುದು.ಗಣಪತಿ ಹಬ್ಬವನ್ನು ಶಿವಾನುಭವ ಶಿಬಿರವನ್ನಾಗಿ ಮಾರ್ಪಡಿಸಿದ್ದು ಮಹತ್ವದ ಸಂಗತಿ. ಬಸವ ಜಯಂತಿಯನ್ನೂ ಒಳಗೊಂಡಂತೆ ಹಲವು ಶಿವಶರಣರ ಜಯಂತಿಗಳನ್ನು ಆಚರಿಸುವ ಮೂಲಕ ವಿದ್ಯಾರ್ಥಿಗಳಿಗೆ, ಸಾರ್ವಜನಿಕರಿಗೆ ಶರಣರ ವಿಚಾರಗಳನ್ನು ತಿಳಿಸಲಾಗುವುದು. ವಿದ್ಯಾರ್ಥಿಗಳಿಗೆ ಸಿರಿಗೆರೆ 'ವಚನ ಮಂಟಪ'ದವರು ನಡೆಸುವ ವಿಶೇಷ ವಚನ ಪ್ರವೇಶ, ವಚನ ಪರಿಚಯ, ವಚನ ವಿಶಾರದ, ವಚನ ಪ್ರವೀಣ ಎನ್ನುವ ಪರೀಕ್ಷೆಗಳನ್ನು ಪ್ರತಿವರ್ಷ ನಡೆಸಲಾಗುವುದು. ಅದಕ್ಕಾಗಿ ವಚನ ಪಠ್ಯವಿದ್ದು ಅಧ್ಯಾಪಕರು ವಿದ್ಯಾರ್ಥಿಗಳಿಗೆ ಪಾಠ ಮಾಡುವರು. ಸಾಮೂಹಿಕ ಮದುವೆಗಳಲ್ಲೂ ಧಾರ್ಮಿಕ ವಿಚಾರಗಳನ್ನು ಹೇಳುವ ಮೂಲಕ ಜನರಲ್ಲಿ ಧಾರ್ಮಿಕ ಶ್ರದ್ಧೆ ಮೂಡಿಸಲಾಗುವುದು. ಆಗಾಗ ಶಿವಾನುಭವ ಪ್ರವಾಸದ ಮೂಲಕವೂ ಧರ್ಮತತ್ವದ ಪ್ರಚಾರ ಮಾಡಲಾಗುವುದು.